උක් ගොවීන්ගේ ගැටලු විසඳීමට වත්මන් ආණ්ඩුව මැදිහත් නොවීම නිසා ගැටලුව නිර්මාණය කළ එදා ආණ්ඩුවේ පිරිස්, අද විපක්ෂයේ මුහුණින් ගොවීන් ඉස්සරහට ඇවිත් කිඹුල් කඳුළු හෙළනා බව ගොවි අරගල ව්‍යාපාරයේ ජාතික සංවිධායක විමල් වත්තුහේවා මහතා පැවසීය.
ඒ මහතා මෙසේ පැවසුවේ පෙරේදා (03) නුගේගොඩ පැවති මාධ්‍ය හමුවකට එක් වෙමිනි.
එහිදී වැඩිදුරටත් අදහස් දැක්වූ ඒ මහතා මෙසේද පැවසීය.
“මාස ගණනාවක සිට පැල්වත්ත, සෙවණගල, හිඟුරාන සහ ඇතිමලේ ප්‍රදේශවල උක් ගොවීන් බරපතළ ගැටලු රැසකට මුහුණ දෙනවා. බලධාරීන් සමඟ සාකාච්ඡා කළත් ගැටලුවට විසඳුමක් නෑ. මේ වෙද්දී සීනි මෙට්‍රික්ටොන් 23,000ක් සහ එතනෝල් විශාල ප්‍රමාණයක් විකුණගන්න ක්‍රමයක් නැහැ. අනිත් පැත්තෙන් උක් වගාවට පොහොර යොදන්න ඕන කාලේ ඇවිත්. නමුත් ගොවීන්ට පොහොර ගන්න විදිහක් නෑ. පැළ තවාන් නඩත්තු කර ගන්න විදිහක් නෑ. ඒ කියන්නේ ඊළඟ කන්නයේ වගාවට අවශ්‍ය බීජ ටිකවත් ගොවීන්ට ලැබෙන්නෙ නෑ.
උක්වලට වඩා අඩු වියදමකින් බඩඉරිඟු මඟින් එතනෝල් නිෂ්පාදනය කරන්න පුළුවන්. එතනිනුත් පහර වදින්නේ උක් ගොවීන්ට. අනිත් එක තමයි මේ වෙද්දි කුඹුරුවල ගොයම් කැපෙනවා. එතකොට සහල්වලිනුත් එතනෝල් නිෂ්පාදනය කරන්න පුළුවන්. ආණ්ඩුව පැත්තෙන් මේ ප්‍රශ්නය සඳහා දිය හැකි උත්තරයක් තියෙනවා. එකක් තමයි සීනි නිෂ්පාදනයට අදාළව පනවා ඇති වැට් බද්ද ඉවත් කිරීම. අනිත් එක තමයි බඩඉරිඟු එතනෝල් නිෂ්පාදනයට දීලා තියෙන බලපත්‍රය සම්බන්ධයෙක් තීරණයක් ගැනීම. හැබැයි මෙන්න මේ නිශ්චිත උත්තරේ නොදී ආණ්ඩුව උක් ගොවීන්ව කබලෙන් ළිපට ඇදලා දාලා.
දැන් මේ තත්ත්වය පාවිච්චි කරල එළියට බැහැගන්න බැරුව හිටපු විපක්ෂය ටිකෙන් ටික උළුව උස්සන්න පටන් අරගෙන තයෙනවා. අපි දැක්කා පසුගිය දවසක සජිත් ප්‍රේමදාස පැල්වත්තේ ගොවීන් හමු වුණා. පෙරේදා දවසේ නාමල් රාජපක්ෂ සෙවණගල සහ පැල්වත්ත ප්‍රදේශවල රැස්වීම් පැවත්වුවා. මොවුන් තමයි මේ ප්‍රශ්නය හැදුවෙත්. සීනි නිෂ්පාදනයට වැට් බද්ද ගැහුවේ 2023 දෙසැම්බර් 23 වැනිදා. ඒ සුසිල් ප්‍රේමජයන්ත ඇමැතිවරයා ගෙනාව පනතකින්. එදා තමයි සුදු සීනි බේරලා රතු සීනිවලට විශාල බද්දක් ගැහුවේ. එදා ඒකට අත උස්සපු නාමල් රාජපක්ෂලා අද ගොවීන් ඉස්සරහට ඇවිල්ලා කිඹුල් කඳුළු හෙළනවා. ”
රන්මලී සෝමසිරි
Be First to Comment