පුරාවස්තු හෝ ආගමික ස්ථාන කේන්ද්ර කර ගනිමින්, අද දවසේද, තැනින් තැන ජාතිවාදී ගැටුම් ඇවිළවීමට ඇතැමුන් උත්සාහ කළද උතුරේ, දකුණේ නැඟෙනහිර හෝ කවර ප්රදේශයක වුවද කිසිදු අන්දමකින් ජාතිවාදයට යළි ඉඩ නොතබන බව ජනාධිපති අනුර කුමාර දිසානායක මහතා අවධාරණය කළේය.
ජනාධිපතිවරයා මෙම අදහස් පළකළේ යුද්ධයෙන් අවතැන්වූ උතුරු සහ නැඟෙනහිර පවුල් නැවත පදිංචි කිරීම වෙනුවෙන් නිවාස 2500ක් ඉදිකිරීම ඇතුළුව රට පුරා නව නිවාස 31,218ක් ඉදිකිරීමේ ‘තමන්ගෙම තැනක් – ලස්සන ජීවිතයක්’ ජාතික නිවාස වැඩසටහන 2026 සමාරම්භක අවස්ථාවට පසුගියදා (16) පෙරවරුවේ චාවකච්චේරිය, මීසාලේ, වීරසිංහ ප්රාථමික විදුහල් ක්රීඩාංගණයේදී එක්වෙමිනි.
එහි දී වැඩිදුරටත් අදහස් දැක්වූ ජනාධිපති අනුර කුමාර දිසානායක මහතා මෙසේද කීවේය.
“යුද්ධයේ දී විශාල නිවාස ප්රමාණයක් හානියට පත් වුණා. නමුත් විශාල කාලයක් ගතවී තිබුණත් එම නිවාස මුළුමනින් ඉදිකර අවසන් කර නැහැ. මම දන්නවා මේ යාපන දිස්ත්රික්කයේ ජීවත්වන ජනතාව යුද්ධය කාලයේත් අවතැන්වී සිටියා. යුද්ධයෙන් පසුවත් අවතැන් වී සිටිනවා. දීර්ඝ කාලයක් තමන්ගේම වූ නිෙවසක් නොමැතිව, තමන්ටම වූ තැනක් නොමැතිව පවුලක් ජීවත් වීම එතරම් යුක්තිසහගත දෙයක් නොවෙයි. ඒ නිසා අපේ කාලය ඇතුළත, යුද්ධයෙන් අවතැන්වී සිටින සියලු ජනතාවගේ නිවාස ප්රශ්නය විසඳනවා.
මම දන්නවා මේ ප්රදේශවල සිටින ජනතාව විශාල බලාපොරොත්තුවකින් සහ අපේක්ෂාවකින් යුතුව මේ ආණ්ඩුව පත් කර ගැනීමට දායකත්වය ලබා දුන්නා. දීර්ඝ කාලයක් මේ පළාත්වල සිදු වුණේ පවතින ආණ්ඩුව සමඟ විරුද්ධ, ආණ්ඩුව සමඟ එකඟ නොවන මතවාදයක් ඇතිවීමයි. එය වැරදි නැහැ. ආණ්ඩුව ජාතිවාදය පෝෂණය කරනවා නම්, ආණ්ඩුව ජනතාවගේ දේපොළ සොරකම් කරනවා නම් ආණ්ඩුව පොදු ජනතාව ගැන කල්පනා කරන්නේ නැතිව ඒ අය ගැන විතරක් කල්පනා කරනවා නම් ජනතාව සහ ආණ්ඩුව ඈත්වීම වළක්වන්න බැහැ. ඒවා ජනතාවට විරුද්ධ ආණ්ඩු. ගැටුම් හදන ආණ්ඩු. තමන්ගේ පවුලේ අය වෙනුවෙන් විතරක් හදාගන්න ආණ්ඩු. හැබැයි අද ලංකාවේ පළමු වතාවට මේ රටේ පොදු ජනතාවගේ ආණ්ඩුවක් හැදිලා තිබෙනවා.
මම දන්නවා මැතිවරණවලදී විශේෂයෙන් උතුරේ ජනතාව තුළ අප පිළිබඳ යම් කුකුසක්, දෙගිඩියාවක් සැකයක් තිබෙන්න ඇති. අපි බලයට ගේන්න ඡන්දය දුන්නත් යම් සැකයකින් යුතුව ඡන්දය දෙන්න ඇති. දැන් අපි ආණ්ඩුව හදලා වසරකට ටිකක් වැඩි කාලයක් ගත වී තිබෙනවා. තවත් සැකයක් තිබෙනවද? අද පළමු වතාවට යාපනයේ සිටින ඔබ විශ්වාස කරන ආණ්ඩුවක් රටේ හැදිලා තිබෙනවා. අපි ඔබට එකක් කියනවා. පළමු කොටම අපි අසීරුවෙන් ජීවත්වන ජනතාවගේ ජීවිත සුවපත් කළ යුතුයි. ඒ සඳහා ආණ්ඩුක් ලෙස කළ හැකි සෑම දෙයක්ම අපි කරනවා.
ගෙයක් නැති කෙනකුට ගෙයක් ලබා දෙන්න අපි කටයුතු කරන්නම්. දරුවන්ට හොඳ අධ්යාපනයක් ලබා දිය යුතුයි. ඒ වෙනුවෙන් වැඩිම මුදල් ප්රමාණයක් අපි මෙවර අය-වැයෙන් වෙන් කර තිබෙනවා. ජනතාවට හොඳ ආදායම් මාර්ගයක් සකස් කර දිය යුතුයි. විශේෂයෙන් කෘෂිකර්මාන්තය, පොල් කර්මාන්තය, ධීවර සහ කුඩා කුඩා සුළු කර්මාන්ත මේ ප්රදේශවල ජනතාවගේ ප්රධාන ජීවනෝපාය මාර්ග බවට පත්ව තිබෙනවා. අපේ ආණ්ඩුවේ අරමුණ එම සෑම කර්මාන්තයක් සඳහාම අවශ්ය සහාය ලබාදී ඔවුන්ගේ ජීවන තත්වය මීට වඩා උසස් කිරීමයි. අපි ඒ වෙනුවෙන් වැඩ කරන ආණ්ඩුවක්.
දීර්ඝ කාලයක් ගැටුම් තිබුණා. අපි කිසිවකුට ප්රතිඵලයක් ලැබුණේ නැහැ. මොනවද ඒ ගැටුමෙන් අපිට ඉතිරි වුණේ. නිවාස අහිමි වූ පවුල්, අම්මා, තාත්තා අහිමි වූ දරුවන්, ආර්ථිකය මුළුමනින්ම කඩා වැටිලා, ඥාතීන්, මිතුරන් අහිමි වෙලා. උතුරේත්, දකුණේත් ජනතාව මේ යුද්ධයේ ගොදුරු බවට පත් වුණා. ඒ මුළු විනාශයම පිටුපස තිබුණේ දේශපාලනය, බලය ලබා ගැනීම. බලය ලබා ගැනීම වෙනුවෙන් සිංහල ජනතාව උසිගන්වනවා. බලය ලබා ගැනීම වෙනුවෙන් දෙමළ ජනතාව උසිගන්වනවා. මෙවන් ජාතිවාදී දේශපාලනයක් තිබුණා.
සියලුදෙනා සහෝදරත්වයෙන්, සමගියෙන් ජීවත්වන රටක් අපිට අවශ්යයි. ඒ වගේම හොඳ ආර්ථිකයක් තිබෙන විනෝදය, සතුට තිබෙන ජීවිතයක් අපිට අවශ්යයි. අපි මේ යාපනයේ විශාල ක්රීඩාංගණයක් ඉදිකිරීමට සැලසුම් කර තිබෙනවා. එහි වැඩකටයුතු අපි මේ වසර තුළ ඉතා වේගයෙන් අවසන් කරනවා. දරුවන්ට ක්රීඩා කරන්න, තමන්ගේ සතුට, විනෝදය එක් කර ගැනීමට එම අවස්ථාව අපි ඇති කළ යුතුයි. ඒ වගේම යාපනය නගරයේ ගෘහස්ථ ක්රීඩාංගණයක් ඉදිකිරීමට අපි සැලසුම් කළා. නමුත් දේශපාලකයන් විසින්ම අධිකරණයට ගිහින් නඩුවක් දැම්මා. ඒ ගෘහස්ථ ක්රීඩාංගණය යාපනයේ දරුවන්ට අවශ්යයි. හැබැයි දේශපාලකයන් නඩු දානවා. ඒ කියන්නේ ඔවුන් කරන්නේ ජනතාවට විරුද්ධ දේශපාලනයක්. අපි ඉතා ඉක්මනින් ඒ නඩුව අවසන් කර ඒ ආසන්න තැනක එම ගෘහස්ථ ක්රීඩාංගණය මේ වසරේ ඉදිකර අවසන් කිරීමට සැලසුම් කර තිබෙනවා.”
නිවාස, ඉදිකිරීම හා ජල සම්පාදන ඇමැති වෛද්ය සුසිල් රණසිංහ මහතා-
“ජාතික නිවාස වැඩසටහන යටතේ අද දිනයේ දී යුද්ධය නිසා අවතැන් වූ උතුරු නැඟෙනහිර ජනතාව වෙනුවෙන් නිවාස ඉදිකිරීම සඳහා ආධාර ලබා දීම සිදු වෙනවා. රට තුළ නිවාස ව්යාපෘති දෙකක් ක්රියාත්මක වන අතර ඒ යටතේ පසුගිය කාලයේ ඇති වූ සුළි කුණාටුවෙන් ඇති වූ ආපදා තත්වය තුළ නිවාස අහිමිවූවන් වෙනුවෙන් වූ නිවාස වැඩසටහන හා අද ආරම්භ කරන ජාතික නිවාස වැඩසටහන ක්රියාත්මක වෙනවා. මෙම ජාතික නිවාස වැඩසටහන අමාත්යංශ පහක් යටතේ ක්රියාත්මක වන අතර එයින් නිවාස 31,218ක් ඉදිකිරීමට බලාපොරොත්තු වෙනවා. එයට යුද්ධයෙන් අවතැන්ව නිවාස අහිමි වූ උතුරු නැඟෙනහිර ජනතාව වෙනුවෙන් නිවාස 2,500ක් ඉදිකිරීමේ වැඩසටහන පවතිනවා. ඒ සඳහා එක් නිෙවසකට රුපියල් ලක්ෂ 20 බැගින් රුපියල් මිලියන 5,000ක් වෙන්කර තිබෙනවා.”
යාපනය දිස්ත්රික් පාර්ලිමේන්තු මන්ත්රී කේ. ඉලංකුමරන් මහතා-
යුද්ධයෙන් අවතැන් වූ පවුල් දහනව දහසක් පමණ උතුරු නැඟෙනහිර පළාත් දෙකෙහි ජීවත් වෙනවා.
ඒ අතරින් 2,500ක් සඳහා මේ වසරේදී නිවාස ලබා දීමට රජය සැලසුම් කර තිබෙනවා.
මීට පෙර නිවාස ව්යාපෘති සඳහා ලැබුණ මුදල නිෙවසක් ඉදි කිරිමට ප්රමාණවත් වුණේ නැහැ. ඒ නිසා ජනාධිපතිවරයා ඒ ආධාර මුදල ලක්ෂ දහයේ සිට පහළොව දක්වාත් ඉන්පසු ලක්ෂ විස්ස දක්වාත් වැඩි කරමින් ජනතාවට වඩාත් හොඳ ජල විදුලි පහසුකම් සහිත නිෙවසක් ඉදිකර ගත හැකි තත්වයක් උදාකරදී තිබෙනවා.”
නිවාස, ඉදිකිරීම් හා ජල සම්පාදන අමාත්යාංශයේ ලේකම් එල්.බී. කුමුදුලාල් මහතා උත්සව සභාව පිළිගනිමින් අදහස් දැක්වීය.
මෙම අවස්ථාව සඳහා ධීවර, ජලජ සහ සාගර සම්පත් ඇමැති රාමලිංගම් චන්ද්රසේකර්, නිවාස නියෝජ්ය ඇමැති ටී. බී. සරත්, උතුරු පළාත් ආණ්ඩුකාර නාගලිංගම් වේතනායහන්, යාපනය දිස්ත්රික් පාර්ලිමේන්තු මන්ත්රීවරුන් වන ජෙයචන්ද්රමූර්ති රජීවන්, ෂන්මුගනාදන් භවනන්දරාජා, සිවඥානම් ශ්රීධරන්, ජී.ජී. පොන්නම්බලම්, උතුරු පළාත් සභාවේ ප්රධාන ලේකම් තනුජා මුරුගේසන් මහත්ම මහත්මීන් ඇතුළු උතුරු පළාතේ මහජන නියෝජිතයන් සහ යාපනය දිස්ත්රික් ලේකම් එම්. ප්රදීපන් මහතා ඇතුළු රාජ්ය නිලධාරීහු සහ ප්රදේශවාසී ජනතාව විශාල පිරිසක් එක්ව සිටියහ.
උපාලි කරුණාරත්න
Be First to Comment