නව අධ්යාපන ප්රතිසංස්කරණ ආරක්ෂා කරගෙන එයට විරුද්ධ කුඩා බලවේග පරාජය කර ජයග්රහණය කළ යුතු බවත් එය ජාතික සංවර්ධනයේ අඩිතාලම බවට පත්කරගත යුතු බවත් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පැවසීය.
අමාත්යවරයා මේ බව කියා සිටියේ ‘අනාගතය ඔබයි-ඉගෙන ගන්න- හෙට දිනන්න ’මැයෙන් මහනුවර තැපැල් ශ්රවණාගාරයේදී පෙරේදා (17) දින පැවති අධ්යාපන ප්රතිසංස්කරණ කතිකාවට එක්වෙමිනි.
එහිදී වැඩිදුරටත් අදහස් පළ කළ අමාත්යවරයා මෙසේ ද පැවසීය.
‘මේ අධ්යාපන ප්රතිසංස්කරණවලින් අපි බලාපොරොත්තු වෙන්නේ 21 වැනි සියවස හා ඉන් ඔබ්බට ගිය ලෝකය ජයග්රහණය කළ හැකි ආකාරයේ පුරවැසියන් පිරිසක් නිර්මාණය කිරීමයි. අපේ රටේ තිබෙන සාරධර්ම හා සංස්කෘතිය මත පදනම්ව අනෙකා කෙරේ සහකම්පනයක් ඇති වෙන ලෙස රටේ තිබෙන විවිධ ජාති, ආගම්, සංස්කෘතීන්වලට ගරු කරන පුරවැසියන් පිරිසක් නිර්මාණය කරන්න අපිට අවශ්යයි.
මේ අධ්යාපන ප්රතිසංස්කරණය කියන්නේ හරියට වැඩෙන දරුවෙක් වගේ. නමුත් අවාසනාවකට මුළු මහත් සමාජයම එකතු වෙලා වැඩෙන දරුවා ආරක්ෂා කරගන්නවා වෙනුවට ඉතාම සීමිත කල්ලියක් විසින් ඒ වැඩෙන දරුවගේ ශරීරයට විෂබීජයක් එන්නත් කරන්න හදනවා.
සජිත් ප්රේමදාස මහත්තයා මේ ප්රතිසංස්කරණවලට අලුත් වචනයක් හඳුන්වා දෙනවා අධ්යාපනයේ අසභ්යකරණය කියලා. විමල් වීරවංශ මහත්තයත් ඒ වගේම දෙයක් කිව්වා. ඒ දෙන්නා දේශපාලන නිවුන්නු. රටක අනාගතය වෙනස් කරන්න ගෙනා අධ්යාපන ප්රතිසංස්කරණවලින් අල්ලා ගත්තු කෑල්ල මොකක්ද? එකම තැන තමයි 6 වසරේ ඉංග්රීසි මොඩියුලය. ඒකේ තිබෙනවා දරුවකුට මිතුරෙක් සොයා ගැනීමට තිබෙන පාඩමක වචනයක්. ඒ වචනය දාපු එකත් වගකීම් විරහිතයි.
ජාතික අධ්යාපන ආයතනයට තමයි ඒ සම්බන්ධව ක්රියා කිරීමට බලය තිබෙන්නේ. ඒකට සම්බන්ධ නිලධාරීන්ට ඒ ආයතනය විසින් විනය ක්රියාමාර්ග ගනිවි. නමුත් විෂය 14ක් සහිත සියලු පොත්වල අසභ්යකරණය කියලා හඳුන්වන්න තියෙන එකම තැන තමයි ඒ වචනය. පොතක පිටකවරය පාට කිහිපයකින් තිබෙන නිසා සමහර අයට හැඟීමක් එනවලු සමලිංගිකයන්ගේ කොඩිය වගේ කියලා. මේක කියන්නේ හිටපු ආණ්ඩුකාරවරයෙක්. මේකට ද අධ්යාපනයේ අසභ්යකරණය කියන්නේ. ඕක තමයි පාවිච්චි කළේ මේ සමස්ත අධ්යාපන ප්රතිසංස්කරණවලට එරෙහිව.
ගම්මන්පිල මහත්තයා කියනවා, පළමු වැනි ශ්රේණියේ පොතේ පරිසරයට අදාළ ක්රියාකාරකම්වල දරුවෝ එළියට ගිහින් බලන්න තියෙන දේවල් අතරෙ වලාකුළු, ගංගා, ඇළ දොළ, ගහකොළ, සතාසීපාවා අතර දේදුන්නකුත් තියෙනවා. ඒ දේදුන්නේ පාට සමලිංගික කොඩියේ පාටලු. මේවා කාට කියන්නද? ඕවා තමයි පාවිච්චි කළේ මේ සමස්ත අධ්යාපන ප්රතිසංස්කරණය කියන වැඩෙන දරුවාට විෂබීජ එන්නත් කරන්න.
ඒ අය කැමැති නැහැ, සූදානම් නැහැ මේ රට සංවර්ධනය කරන්න. 21 වැනි සියවසෙන් ඔබ්බට යන පුරවැසියකු නිර්මාණය කරන්න මේ සමාජ වෙනසට ඉඩදෙන්න සූදානම් නැහැ. මේක මරන්න හදන්නේ. අධ්යාපන ප්රතිසංස්කරණ නතර කරන්න පුළුවන් තරම් උත්සාහ කරනවා. ඒ අයට රටේ දේශපාලනය කරන්න බැහැ, රටේ දරුවෝ යහපත් පුරවැසියන් බවට පත්වෙලා.
විචක්ෂණශීලීව ලෝකය දිහා බලන අලුතින් හිතන්න පුළුවන් කෙනෙක් බවට පත් කළාම ඒ අයට සෙල්ලම් දාන්න බැහැ. ඒ අයට ඕනෑ හැටියට රවට්ටන්න බැරි වෙන පරම්පරාවක් මේ හරහා නිර්මාණය වෙනවා. එවිට අස්වැසුම, සමෘද්ධිය දෙනවා කියලා දේශපාලනය කරන්න බැරි තත්වයක් නිර්මාණය වෙනවා. ණය දෙන්නම් ඡන්දෙට වැඩ කරන්න කියලා ඒ අයට කියන්න බැරි තත්වයක් නිර්මාණය වෙනවා.
තමන්ගේ හැකියාව කුසලතාව වැඩිදියුණු කරගත් අනෙකා ගැන හිතන, නව ලෝකය දකින පුරවැසියන් නිර්මාණය කරන්න අපිට වුවමනාව තිබෙනවා. ඒනිසා අධ්යාපන ප්රතිසංස්කරණ වනසන්න කුඩා කල්ලියකට අපි ඉඩදෙන්නේ නැහැ.
මෙහිදී අදහස් පළ කළ වරාය හා සිවිල් ගුවන් සේවා අමාත්ය අරුණ කරුණාතිලක මහතා මෙසේ පැවසීය.
“දැන් කට්ටියක් කතා කරනවා, මේ යෝජනා කරපු අධ්යාපන ප්රතිසංස්කරණ ක්රියාවලිය තුළ ජාතිය අමතක කරනවා, ඉතිහාසය අමතක කරනවා සංස්කෘතිය අමතක කරනවා කියලා. නමුත් මොන තැනින් ද එහෙම සිදු වෙන්න කියලා ඇහුවොත් ඒ අයට පෙන්වන්න තැනක් නැහැ. මේ පෙළ පොත්වල යෝජනා කරපු කියාවලිය තුළ කොහොම ද ජාතිකත්වය සංස්කෘතිය විතැන්වෙන්නේ කියල කියන්න ඒ අයට බැහැ.
ශිෂ්ට සම්පන්න පුරවැසියන් බිහිකරන්න පුළුවන් අධ්යාපන ක්රියාවලියක් මේ තුළින් යෝජනා වෙලා තියෙනවා. ඒ වගේම තිරසර සහ නවෝත්පාදනය, තිරසර සහ යාවජීව අධ්යාපනය ගැනත් හඳුන්වා දෙනවා. අපි දන්නවා ඉස්කෝලේ ගිහින් ඉගෙන ගත්තම, විශ්වවිද්යාලයට ගිහින් ඉගෙන ගත්තම එතැනින් එහාට අලුත් දේ ඉගෙන ගන්න අලුත් දේවල් සොයායන්න විචක්ෂණශීලී බවින් යුක්ත පිරිස අඩු වෙලා කියලා.
මේ යෝජනා කරන අධ්යාපන ක්රියාවලියෙහි එක පැත්තකින් තමන් ඉගෙන ගන්නා අතර ඒ ඉගෙන ගන්න වටපිටාව ගැන විචක්ෂණශීලී ඇසකින් විමර්ශනාත්මකව බලන්නේ කොහොම ද? ඒ සඳහා නැඹුරු වෙන්නේ කොහොම ද? කියලා අවබෝධ වෙනවා. අන්න ඒ පළපුරුද්දක් එක්ක තමන් පාසලෙන් එළියට ගියත් විශ්වවිද්යාලයෙන් එළියට ගියත් අර ඉගෙනීම සඳහා තිබෙන කැමැත්ත අපි හදනවා.
මේක ඉතිහාසයේ අධ්යාපන ක්රියාවලියේ විකාශනයන් අමතක කරලා හදපු අධ්යාපන ප්රතිපත්තියක් නෙමෙයි. එහෙම ප්රතිපත්ති හදන්න බැහැ. මේ අලුත් වැඩපිළිවෙළක් එක්ක මොඩියුල කියන සංකල්පය ගැන සමහරු කියනවා මේ පින්ලන්තයේ තිබෙන අධ්යාපන ක්රියාවලියට යනවා කියලත් ඒකෙන් අපේ අධ්යාපන ක්රමය වැටෙනවා කියලා. නමුත් එංගලන්තය ඇතුළු ලෝකයේ බොහෝ රටවල් පාසල් පද්ධතියෙහි මේ මොඩියුල කියන සංකල්පය ඇති කරලා තියෙනවා. “
අධ්යාපන ප්රතිසංස්කරණ උදෙසා ජාතික ව්යාපාරයේ සම කැඳවුම්කරු විදුහල්පති සංගමයේ ලේකම් සිසිර රාජපක්ෂ මහතා අදහස් දක්වමින්,
“අධ්යාපනය පිළිබඳ ප්රබල කතාබහක් ඇති වෙලා තිබෙන වෙලාවක මේ පුළුල් සංවිධානය අපි ආරම්භ කළා. අද අපට මාතෘකාවක් ඇවිත් තිබෙනවා අනිවාර්යෙන්ම මඟහැර යා නොහැකි ඉතාමත්ම සංවේදි මාතෘකාවක්. අපි දන්නවා විටින් විට අධ්යාපනයේ වෙනස්කම් සිදු කරනවා. ඒ අනුව අද දවසෙත් අධ්යාපන ප්රතිසංස්කරණයක් අරගෙන ඇවිත් තියෙන වෙලාවක, ඒ වෙනුවෙන් පුළුල් කතාබහක් ගොඩනැඟිලා තිබෙන වෙලාවක අපි මේක ආරම්භ කළා.
පාසල් පද්ධතිය පැත්තෙන් ගත්තාම අපි දකිනවා ප්රායෝගික ගැටලු ගොඩක්. මේ ගැටලුවලට මුලින්ම සංවේදී වන්නේ ගුරුවරයා, විදුහල්පතිවරයා දරුවා වගේම මවුපියෝ. අපි දකිනවා උදේ පාසල අසල ඉන්න විට මහ විශාල පොත් මල්ලක් කරේ තියාගෙන පුංචි දරුවෝ අමාරුවෙන් පාසලට එන හැටි. ඒ පොත් මල්ල කරේ දමාගෙනම පුංචි දරුවෝ අපිට වඳිනවා. සමහර වෙලාවට ඒ පොත් මල්ල දරාගන්න බැරිව දරුවෝ වැටෙන අවස්ථා තියෙනවා.
පාසල පැත්තෙන් ගත්තම අද වන විට ගුරුවරු විදුහල්පතිවරු දැඩි ප්රයත්නයක නියැළෙනවා දරුවෝ ටික පාසලට ගෙන්වා ගන්න. ඔබ දන්වා උසස් පෙළ පන්තිවල තත්වය කොයිතරම්ද කියනවා නම්, විශේෂයෙන්ම 13 වසරට යන විට දරුවෝ තමයි තීරණය කරන්නේ කවද්ද පාසලට යන්නේ කියලා. එහෙමවත් එන්නේ නැහැ. වාර පරීක්ෂණයට එන්නේ නැහැ. ඒ නිසා මේ පාසල තවදුරටත් දරුවට හිතකර ඒ වගේම ආකර්ෂණීය තත්වයක් නිර්මාණ කරන්නේ නැහැ, මේ පවතින අධ්යාපන ක්රමය තුළ.
මේ අධ්යාපන ප්රතිසංස්කරණ කියන එක පාලකයන්ට ඇමැතිවරුන්ට ඒ තරම් හිතකර දෙයක් නෙමෙයි. ඇතැම් අවස්ථාවල ඇමැතිවරු ගෙදර යන්නෙත් මේ ප්රතිසංස්කරණ නිසා. මේ ප්රතිසංස්කරණවලට යන විට ශක්තිමත්ව ඉලක්ක සහගතව යන්න ඕනෑ. අද දවසේ ඒ ගොඩනැඟිය යුතු පුළුල් කතාබහ ගොඩනැඟීමේ අරමුණිනුයි අධ්යාපන ප්රතිසංස්කරණ උදෙසා අපි මේ ජාතික ව්යාපාරය ගොඩනඟා ගත්තේ.
සෙංකඩගල නගරයෙන් ආරම්භ වන මේ ඓතිහාසික කතාබහ දිස්ත්රික්කයෙන් දිස්ත්රික්කයට අරන් ගිහින් දැවැන්ත බුද්ධිමය සාකච්ඡාවක නියැළෙනවා.“
අධ්යාපන ප්රතිසංස්කරණ උදෙසා ජාතික ව්යාපාරයේ සම කැඳවුම්කරු ලංකා ගුරු සේවා සංගමයේ සභාපති ධම්මික අලහප්පෙරුම මහතා අදහස් දක්වමින් මෙසේ පැවසිය,
“දරුවන්ට හොඳ රටක් භාර දෙන්න නම්, හොඳ වෘත්තීන්වලට දරුවා රැගෙන යන්න අවශ්ය නම්, ඔහුට හොඳ අධ්යාපනයක් ලබාදිය යුතුයි. ඒ සඳහා අප රටේ ගමක් ගමක් ගානේ තිබෙන පාසල් පද්ධතිය, එදා මේ රටේ ගෙනා නිදහස් අධ්යාපනයේ අයිතිය. ඒ දියුණු මානවයා නිර්මාණය කර තිබෙන අපේ ඊළඟ පරම්පරාවට මීට වඩා හොඳ අධ්යාපනයක් ලබාදෙන්නේ කොහොම ද? කියන එක මත තමයි මේ අධ්යාපන ප්රතිසංස්කරණ අපි පෙළගස්වලා තිබෙන්නේ.
ඉතිහාසයේ මේ රටේ බලයේ හිටපු පාලකයන් විසින් කරපු අධ්යාපන ප්රතිසංස්කරණවල ප්රතිඵල තමයි අද අපේ දරුවෝ බුක්ති විඳින්නේ. ඔබ දන්නවා ඇති මහනුවර නගරය ගත්තොත් ප්රධාන පාසල්වලට තිබෙන තරගය.
‘අධ්යාපන ප්රතිසංස්කරණ උදෙසා ජාතික ව්යාපාරය‘ විසින් පළමු වරට සංවිධානය කළ මෙම වැඩසටහනට නියෝජ්ය අමාත්යවරු වන වෛද්ය ප්රසන්න ගුණසේන, වෛද්ය හංසක විජේමුනි ඇතුළු පිරිසක ද එක්ව සිටියහ.
කටුගස්තොට සමූහ
එස්.ජී. විජේරත්න
Be First to Comment