ත්රස්තවාදී නායකයන්ට යුද්ධයේ අවසන් දින කිහිපයේ යටත් වීමට අවකාශය ලබාදෙන්න යැයි රාජපක්ෂලා උපදෙස් දී තිබුණ බව හිටපු පාර්ලිමේන්තු මන්ත්රී, ෆීල්ඩ් මාර්ෂල් සරත් ෆොන්සේකා මහතා යුද සමයේ ආරක්ෂක ප්රධානීන් සමඟ සිදු කළ බව කියන රහසිගත සාකච්ඡාවක වීඩියෝවක් මාධ්යයට නිකුත් කරමින් ඊයේ (18) පැවසීය.
එහෙත් තමන් හමුදාවට නියෝග දී තිබුණේ එල්ටීටීඊය සම්පූර්ණයෙන්ම අතුගා දමන්න යැයි ද හෙතෙම කීවේය.
සරත් ෆොන්සේකා මහතා වීඩියෝ දර්ශනයක් පෙන්වමින් වැඩිදුරටත් මෙසේද පැවසීය.
“යුද්ධය යන අතරේ මේ අය කොහොම ද යුද්ධය කඩාකප්පල් කරන්න හැදුවේ කියලා මම මේ වීඩියෝවෙන් පෙන්වන්නම්. මේ කතාව යන්නේ 2009 මැයි 17 දවල් කාලයේදි. මේකෙ මේ අය කියනවා උදේ වරුවේ ආරක්ෂක ලේකම්ගෙන් තමයි ඔය කෝල් එක එන්නේ ශවේන්ද්ර සිල්වාට කියලා.
එදා දිවා කාලයේ, මම දන්නෙත් නැහැ. මම චීනයේ හිටියේ. මට දැනුම් දුන්නේ නැහැ. මගේ ළඟ සන්නිවේදන උපකරණ, දුරකතන සියල්ල තිබුණා ආරක්ෂක කවුන්සිලයේ අයට කතා කරන්න. මම චීනයේ හිටියා. මගේ මෙහෙයුම් කාර්ය මණ්ඩලයම මම එක්ක එහෙ හිටියා. මම එහෙ ඉද්දිත් දිගටම කොළඹ ඉන්නවා වගේම යුද්ධයට අණ දුන්නා. නමුත් මටවත් කියන්නෙවත් නැතුව මේගොල්ලෝ සාකච්ඡා කරලා තිබෙනවා 17 වැනිදා උදේ අයි.සී.ආර්.සී. එකේ මෙහේ හිටපු ප්රධානිය එක්කයි.
ක්ෂමා ආයතනයේ නියෝජිතයත් එක්ක, බැසිල්, ගෝඨාභය, මහින්ද රාජපක්ෂලා සාකච්ඡාවක් කරලා තිබෙනවා ත්රස්තවාදී නායකයන්ට යටත් වෙන්න අවකාශය ලබා දෙන්න. මගේ නියෝගය තිබුණේ එල්ටීටීඊය සම්පූර්ණයෙන්ම අතුගාල දාන්න. ඒකට තමයි යුද සැලසුම් කළේ. එල්ටීටීඊ එක බේරගන්න අවශ්යතාවක් තිබුණේ නැහැ. ඉතා පැහැදිලි අරමුණක ඉඳලා තමයි අපි යුද්ධ කළේ. ඔය දවස් වෙන කොට එල්ටීටීඊ එක මීටර් 400කට කොටු කරලා. මුලතිව්වලට පොඩ්ඩක් උඩින්. වෙල්ලිමුල්ලිවයික්කාල්වලට පොඩ්ඩක් පහළින්, නන්දිකඩාල් කලපුව අයිනේ. 16 වැනිදා රෑ වෙනකොට කොටු කරලා අවසන්. ඒ අය දන්නවා ඉදිරි පැය 24 තුළදී මේගොල්ලෝ විනාශ වෙනවා කියලා. අපිට ඕනෑ කරලා තිබුණේ විනාශ කරන්න.
එහෙම තියෙද්දි තමයි මේ ගොල්ලෝ එහෙම කතා කරලා තියෙන්නේ. එහි සවුන්ඩ් පැහැදිලි නැති වුණාට සබ්ටයිටල් තිබුණා. ඔය වීඩියෝ කරපු එක්කෙනත් දැන් රටින් පැනලා ගිහින් ඉන්නේ ගෝඨාභයලා ඒ අය මරන්න හදපු නිසා. ඒ මාධ්යවේදියා හැංගිලා පිටරට ඉන්නේ. එල්ටීටීඊ එක කියනවා ආමි එකට යටත් වෙන්න බැහැ තුන්වැනි පාර්ශ්වයකට යටත් වෙන්නම් කියලා. නමුත් අපි ඒක හින්දා කැමැති වුණේ නැහැ කියලා කතාවක් කියනවා. වැරැදිලා හරි ආමි එකට යටත් වෙන්න කැමැති වුණා නම් රාජපක්ෂලා නියෝග දෙනවා මේ අය භාර ගන්න.
භාරගෙන ජීවිත බේරගන්න කියලා. මේක තමයි 17 වැනිදත් රාජපක්ෂලගේ ඔළුවේ තිබුණ විෂ බීජය. එතකොට මේක ඉෂ්ට වුණේ නැහැ. අන්තිමට එල්ටීටීඊ එක විශ්වාස කළේ නැහැ, මේගොල්ලෝ කියන එක. ඒ නිසයි අපිට අවස්ථාව ලැබුණේ 19 වැනිදා වෙන කොට මේගොල්ලෝ සම්පූර්ණයෙන්ම විනාශ කරලා තමුන්නාන්සේලා අද භුක්ති විඳින නිදහස, ආරක්ෂාව සලසා දෙන්න. එදා මේක මේ විදියට වුණා නම් මේ වෙනකොට උතුරු නැඟෙනහිර මහ ඇමැතිවරයා කරලා ප්රභාකරන්. එතැන සුසෙයි හිටියා. පොට්ටුඅම්මාන් හිටියා. එයාගේ බිරිඳ හිටියා. කර්නල් තිලීපන්ලා ඇතුළු නායකයෝ හිටියා. නැඟෙනහිරෙන් පලා ගිය රමේෂ් ඇතුළු පිරිසත් ඔතන ඉඳලා තිබෙනවා. මේ ඔක්කෝමගේ ජීවිත බේරන්න තමයි 17 වැනිදා ජාතියේ වීරයා කියන මහින්ද රාජපක්ෂ උත්සාහ කළේ.
මේ වීඩියෝ එක ජනතාව දකින්න ඕනෑ. තේරුම් ගන්න ඕනෑ. මෙච්චර කල් මෙය එළියට එන්නේ නැතුව මේ මාධ්යවේදියා හංගගෙන හිටියා. වෙනත් වක්ර මාර්ගයකින් මෙය මගේ අතට පත්වුණා. ඒකයි මම මෙය එළියට දැම්මේ ජනතාව දැනුවත් කරන්න.”
Be First to Comment