පසුගිය රජය සමයේ ඉහළ තනතුරු හෙබවූ ශ්‍රී ලාංකිකයන් දෙදෙනකුට හා ඔවුන්ගේ පවුල්වල උදවියට අමෙරිකාවේ රාජ්‍ය දෙපාර්තමේන්තුව සම්බාධක පැනවීමට තීරණය කළේ දූෂණ මැඬපැවැත්වීමේ ක්‍රියාමාර්ගයක් ලෙස යැයි ශ්‍රී ලංකාවේ අමෙරිකානු තානාපතිනි ජුලී චන්ග් මහත්මිය මල්වතු මහානායක ස්වාමීන්ද්‍රයන් වහන්සේ හමුවේ පැවසුවාය.
පැවැති රජයේ ප්‍රබලයන් දෙදෙනකුට ඇමෙරිකාවට ඇතුළු වීම තහනම් කර තිබෙන බවට දැක්වෙන මාධ්‍ය වාර්තා සම්බන්ධයෙන් මල්වතු මහානායක තිබ්බටුවාවේ ශ්‍රී සිද්ධාර්ථ සුමංගල මහනාහිමියන් කරුණු විමසූ අවස්ථාවේ අමෙරිකානු තානාපතිනිය මේ බව කීවාය.
ජුලී චන්ග් මහත්මිය ඊයේ (11) පස්වරුවේ මල්වතු මහා විහාරයට ගොස් මල්වතු මහානායක ස්වාමීන්ද්‍රයන් වහන්සේ බැහැදැක අමෙරිකාව මඟින් ශ්‍රී ලංකාව තුළ ක්‍රියාත්මක කරන ව්‍යාපෘති සම්බන්ධයෙන් උන් වහන්සේ දැනුවත් කළාය.
අමෙරිකානු රජය මඟින් සම්බාධක පනවා තිබෙන ශ්‍රී ලාංකිකයන් දෙදෙනාට දූෂණ චෝදනා එල්ල වී තිබුණු බවත් වසරක පමණ කාලයක් තිස්සේ ඒ සම්බන්ධයෙක් කළ සොයා බැලීම්වලින් පසුව අදාළ තීරණයට එළැඹි බවත් ඇය අවධාරණය කළාය.
මේ වන විට විශ්වාසය තැබිය හැකි හොඳ ආණ්ඩුවක් බලයට පැමිණ තිබෙන බැවින් අමෙරිකානු රජයේ සහාය පෙරට වඩා වත්මන් රජයට ලැබෙනු ඇතැයි විශ්වාස කරන බව මෙහිදී මල්වතු මහනාමියෝ පැවසූහ.
වත්මන් ජනපතිවරයා විශාල ජනවරමකින් බලයට පැමිණි බවත් පාර්ලිමේන්තුව තුළ ද ජාතික ජන බලවේගයට විශාල බලයක් තිබෙන බවත් කී අමෙරිකානු තානාපතිනිය බලයේ සිටි සෑම රජයක් සමඟ අමෙරිකාව සහයෝගයෙන් කටයුතු කළේ යැයි ද පැවසුවාය.
වංචාව හා දූෂණය පිටුදැකීම සඳහා ජනපති ප්‍රමුඛ වත්මන් රජය ගෙනයන වැඩපිළිවෙළ සඳහා අමෙරිකාව උපරිම සහාය ලබාදෙන බව ද ඇය කීවාය.
වැස්ස හේතුවෙන් ගොවීන්ගේ වගා විනාශ වී තිබෙන බවත් ඇතැම් අයගේ නිවාස පවා සම්පූර්ණයෙන්ම විනාශ වී තිබෙන බවත් කී මල්වතු මහනාහිමියෝ ඔවුන් සඳහා යම් ආකාරයකින් සරණ වීමේ හැකියාවක් තිබේදැයි තානාපතිනියගෙන් විමසූහ.
ජනපති අනුර කුමාර දිසානායක මහතා කෘෂිකර්මාන්තය සඳහා තාක්ෂණික අංශයේ සහාය අමෙරිකානු රජයෙන් අපේක්ෂා කරන බවත් ඒ සඳහා ක්‍රියාමාර්ග ගන්නා බවත් තානාපතිනිය කීවාය.
ආර්ථික අර්බුදය ඇති වූ අවස්ථාවේ ගොවීන්ට අවශ්‍ය පොහොර දීමට අමෙරිකාව කටයුතු කළ බවත් ග්‍රාමීය පාසල් දරුවන්ට දිවා ආහාරය දීමේ වැඩපිළිවෙළ නාගරික පාසල් දරුවන් වෙත ද ව්‍යාප්ත කිරීමට අපේක්ෂා කරන බවත් ජුලී චන්ග් මහත්මිය පැවසුවාය.
Be First to Comment