වීදිවල සිඟමනේ යෙදවීම, භාණ්ඩ අලෙවියේ යෙදවීම සහ ගෘහස්ථ සේවය ඇතුළු අන්තරායකාරී රැකියාවල ළමයින් යෙදවීම එළැඹෙන ජූලි 01 වැනිදා සිට සපුරා තහනම් කිරීමට රජය තීරණය කර තිබේ.
ඒ අනුව, වයස අවුරුදු 16ට අඩු ළමයින් සිඟමනේ යෙදවීම, වෙළෙඳාම් කටයුතුවල යෙදවීම සහ වයස අවුරුදු 16 – 18 අතර ළමයින් ගෘහ සේවය ඇතුළු අනතුරුදායක රැකියාවල යෙදවීම තහනම් කිරීමට හැකි වන පරිදි දැනට පවතින නීතිමය විධිවිධාන අදාළ බලධාරීන් මඟින් දැඩි ලෙස ක්‍රියාත්මක කිරීමටත් ඒ පිළිබඳ පුළුල් ප්‍රචාරණ වැඩපිළිවෙළක් මඟින් මහජනතාව දැනුම්වත් කිරීමටත් සිය අමාත්‍යාංශය මඟින් ක්‍රියාත්මක කිරීමට සැලසුම් කර ඇති වැඩපිළිවෙළ කාන්තා සහ ළමා කටයුතු ඇමැතිනි, සරෝජා පෝල්රාජ් මහත්මිය ඇමැති මණ්ඩලය වෙත ඉදිරිපත් කරන ලදුව, ඒ සඳහා ඇමැති මණ්ඩලයේ එකඟතාව ලබා දීමට තීරණය කළ බව කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවසීය.
රජයේ ප්‍රවෘත්ති දෙපාර්තමේන්තුවේ ඊයේ (25) පැවති කැබිනට් තීරණ දැනුම්දීමේ මාධ්‍ය හමුවේදී ඇමැතිවරයා මේ බව සඳහන් කළේය.
ළමා අයිතිවාසිකම් ප්‍රඥප්තියට අනුව වයස අවුරුදු 18ට අඩු පුද්ගලයකු, ළමයකු වශයෙන් නිර්වචනය කරනු ලැබ ඇති බවත් නවතම සංඛ්‍යාලේඛනවලට අනුව, රටේ මුළු ජනගහණයෙන් 30%ක් පමණ ළමා ජනගහනයට අයත් වන බවත් ඇමැතිවරයා කියා සිටියේය.
ඇතැම් ළමයින් විවිධ හේතූන් මත කුමන හෝ රැකියාවක් කිරීමට පෙළඹී ඇති බව, තමාගේ මව හෝ පියා සමඟ, එසේ නොමැති නම් මිනිස් වෙළෙඳාමේ ගොදුරක් ලෙස “වීදි දරුවකු” බවට පත් වී මවුපියන් නොවන අයකු සමඟ පොදු ස්ථාන ආශ්‍රිතව සිඟමනේ යෙදෙන බව සහ නොයෙක් දේ අලෙවි කරන බව හඳුනාගනු ලැබ ඇති බව ඇමැති නලින්ද ජයතිස්ස මහතා කීවේය.
නුවන් කොඩිකාර
Be First to Comment