එදා මත්ද්‍රව්‍ය ජාවාරම්කරුවන්ට දේශපාලන රැකවරණය හිමිවුවත් වර්තමානයේ දේශපාලන රැකවරණය හිමිවන්නේ විෂ මත්ද්‍රව්‍ය සමාජගත වීම වැළැක්වීමට කටයුතු කරන රාජ්‍ය නිලධාරීන්ට යැයි වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන ඇමැති වසන්ත සමරසිංහ මහතා පැවසීය.
ඇමැතිවරයා මෙසේ පැවසුවේ අනුරාධපුර පළාත් සභාවේ පැවති විෂ මත්ද්‍රව්‍ය නිවාරණය සඳහා ඒකාබද්ධ සැලැස්ම සැකසීමට අදාළ රැස්වීමකට පසුගියදා (29) එක්වෙමිනි.
අදාළ පාර්ශ්ව දැනුම්වත් කිරීමට මේ වැඩසටහන සංවිධානය කර තිබිණි.
එහිදී වැඩිදුරටත් අදහස් දැක්වූ ඇමැතිවරයා මෙසේ ද කීවේය.
“මත්ද්‍රව්‍ය උවදුරට එරෙහි විදුහල්පතිවරුන්, පාසල් ගුරුවරුන් ඇතුළු ගමේ සමිති සමාගම් එකමුතු කර ගනිමින් මේ වැඩසටහන යටතේ සමාජයීය අවබෝධය වැඩි කරන ක්‍රියාකාරකම්වලට මුල්තැන දිය යුතුව තිබෙනවා. විස මත්ද්‍රව්‍ය බෙදාහැරීමේ යෙදුණු පිරිස්වලට මෙතෙක් දේශපාලනඥයන්ගේ සහාය සහ රැකවරණය හිමි වුවත් වත්මන් ජාතික ජන බලවේගය ආණ්ඩුවෙන් එවැනි සහායක් කිසිසේත් හිමි වන්නේ නෑ. වත්මන් රජයේ දේශපාලන රැකවරණය හිමිවන්නේ සමාජ විරෝධී ක්‍රියාවලට එරෙහිව කටයුතු කරන රාජ්‍ය නිලධාරීන්ට පමණයි. පැන්සල්, මකන, පෑන් ආදියෙත් විස මත්ද්‍රව්‍ය තිබෙනවා. මේවා ගෙදර ගෙනිහින් පොත් මේසේ උඩ තියලා තිබුණත් මවුපියන් අඳුරන්නේ නැතැයි පොලිස් නිලධාරීන් සඳහන් කරනවා. රටේ උන්නතියට විෂ මත්ද්‍රව්‍ය මුළු රටෙන්ම ඉවත් කිරීමේ අරමුණින් කටයුතු කිරීම සියලු පුරවැසියන්ගේ යුතුකමක් සහ වගකීමක් වෙනවා.”
මේ අවස්ථාවට පාර්ලිමේන්තු මන්ත්‍රී සුසන්ත කුමාර නවරත්න, උතුරුමැද පළාත් ආණ්ඩුකාර වසන්ත ජිනදාස, ආණ්ඩුකාර සම්බන්ධීකරණ ලේකම්, මාර්ගස්ථ ප්‍රවාහන සේවා අධිකාරියේ සභාපති, උතුරුමැද පළාත් ජ්‍යෙෂ්ඨ නියෝජ්‍ය පොලිස්පති, පළාත් ප්‍රධාන ලේකම්, අතිරේක දිස්ත්‍රික් ලේකම්, අන්තරායකර ඖෂධ පාලක ජාතික මණ්ඩලයේ නිලධාරීන්, පළාත් අධ්‍යාපන දෙපාර්තමේන්තුවේ නිලධාරීන් සහ පාසල් විදුහල්පතිවරුන් ඇතුළු ප්‍රදේශයේ ස්වේච්ඡා සංවිධාන නියෝජනය කරමින් පිරිසක් සහභාගි වූහ.
Be First to Comment