ඉන්දුනීසියාවේ සිට රැගෙන ආ පාතාල අපරාධකරුවන් අතර සිටි බැකෝ සමන් විසින් හෙළි කළ තොරතුරු අනුව සම්පත් මනම්පේරිගේ පියාට අයත් මිද්දෙණිය ඉඩමක වළ දමා තිබියදී බස්නාහිර පළාත් උතුරු දිසා අපරාධ කොට්ඨාසයේ නිලධාරීන් විසින් සොයා ගත් සුදු පැහැති කැට විශේෂයෙන් අන්තරායකර ඖෂධ පාලක ජාතික මණ්ඩලයෙන් පරීක්ෂා කළ සාම්පල 20න් 17කම මෙතැම්පිටමින් (අයිස්) නමැති රසායනිකය ඇතැයි අනාවරණය වී තිබේ.
අන්තරායකර ඖෂධ පාලක ජාතික මණ්ඩලය විසින් එම වාර්තාව පසුගිය සිකුරාදා බස්නාහිර පළාත් උතුරු දිසා අපරාධ කොට්ඨාසයට දී ඇතැයි තමාට දැනගන්නට ලැබුණු බව පොලිස් මාධ්‍ය ප්‍රකාශක, සහකාර පොලිස් අධිකාරී, නීතිවේදී උදයකුමාර වුට්ලර් මහතා පැවසීය.
මේ කැට විශේෂය සොයා ගත් අවස්ථාවේදී අන්තරායකර ඖෂධ පාලක ජාතික මණ්ඩලයේ නිලධාරීන් ද එහි පැමිණ පරීක්ෂා කිරීම් සිදු කළ අතර, එහිදී ඔවුන් පැවසුවේ ගත් සාම්පල 20න් 05ක මෙතැම්පිටමින් (අයිස්) ඇති බවයි. ඒ බව පොලිස් මාධ්‍ය ප්‍රකාශකවරයා මාධ්‍ය සාකච්ඡාවක් ද පවත්වමින් අනාවරණය කළේය.
අනතුරුව එම නිලධාරීන් රසායනාගාර පරීක්ෂාවක් සිදු කර මේ වාර්තාව දී ඇතැයි පොලීසිය සඳහන් කළේය.
කන්ටේනර් දෙකකින් ඉරානයේ සිට රැගෙන ආ මේ සුදු පැහැති කැට විශේෂය වරායෙන් නිදහස් කිරීමට පෙර පොලිස් මත්ද්‍රව්‍ය කාර්යාංශය සහ රේගු නිලධාරීන් එහි ඇති ද්‍රව්‍ය බිමට හලා වෙනම පරීක්ෂාවක් ද සිදු කර තිබේ. එසේ පරීක්ෂා කිරීමට මුල්වී ඇත්තේ එම කන්ටේනර් දෙකේ අංක ද සහිතව එහි මත්ද්‍රව්‍ය අඩංගු බවට විදේශීය බුද්ධි තොරතුරක් ලැබී තිබීමයි. ඒ නිසාම පොලිස් මත්ද්‍රව්‍ය කාර්යාංශයත්, රේගුවත් මේ සම්බන්ධයෙන් පරීක්ෂා කිරීම් සිදු කර ඇති බවත්, ඔවුන් ද මෙහි මත්ද්‍රව්‍ය තිබේ දැයි උපකරණ මඟින් පරීක්ෂා කර ඇති බවත් පොලිස් සහ රේගු තොරතුරු අනාවරණය කළේය.
කන්ටේනර් දෙක මුදා හැර ඇත්තේ එම පරීක්ෂාවෙන් අනතුරුව පසුගිය ජනවාරි 27 වැනිදාය. මිද්දෙණියට රැගෙන ගොස් ඇති එම කන්ටේනර් දෙක භාරදී ඇතැයි පැවසෙන්නේ මේ වන විට සැඟව සිටින ශ්‍රී ලංකා පොදු පෙරමුණේ අඟුණුකොළපැලැස්ස ප්‍රාදේශීය සභාවට තරග කළ අපේක්ෂකයා වන සම්පත් මනම්පේරි නමැති අය සහ ඔහුගේ සහෝදරයා විසිනි. ශ්‍රී ලංකා පොදුජන පෙරමුණේ හිටපු ප්‍රාදේශීය සභා මන්ත්‍රීවරයෙක් වූ ඔහු මේ වන විට සිටින්නේ බස්නාහිර පළාත් උතුරු දිසා අපරාධ කොට්ඨාස භාරයේ රැඳවුම් නියෝග මතයි.
මේ කන්ටේනර් දෙකේ සුදු පැහැති ද්‍රව්‍ය තිබී ඇත්තේ විශාල උර 40ක දමාය. එම උරවලින් 06ක් ට්‍රක් රථයක පටවා නුවරඑළියට රැගෙන ගිය බවත්, පසුව එම ද්‍රව්‍ය නුවරඑළියේ සිට කඳානේ නිවෙසකට පසුගිය අගෝස්තු මාසයේදී රැගෙන ආ බව අනාවරණය වී ඇත. කඳානේ නිවෙස අගෝස්තු මාසයේදී මට්ටක්කුලියේ පදිංචි පුද්ගලයෙක් විසින් කුලියට ගෙන සිය බිරිය හා දරුවා සමඟ පදිංචිව සිට සැප්තැම්බර් මස 05 වැනිදා නිවෙස් හිමියාට යතුර භාරදී අතුරුදන්ව ඇත්තේ සුදු පැහැති කැට ගෙමිදුලේ මල් පාත්ති තුළ දමාය.
ඒ අතර සුදු පැහැති කුඩු අසල වෙල්යායක දමා තිබී ඇත. පොලීසිය එම කැටත්, සුදු කුඩු විශේෂයත් සිය භාරයට ගත්ත ද ඒවා අන්තරායකර ඖෂධ පාලක ජාතික මණ්ඩලය විසින් පරීක්ෂා කළ බවක් අනාවරණය වන්නේ නැත. එම කැට සහ කුඩු විශේෂය රජයේ රස පරීක්ෂක වෙත පරීක්ෂණ කටයුතු සඳහා යැවීමට කැලණිය කොට්ඨාස අපරාධ ස්ථාන පරීක්ෂණාගාර නිලධාරීන් පියවර ගෙන ඇත. මිද්දෙණියෙන් සොයා ගත් සුදු පැහැති කැට සහ කුඩුවල සාම්පල තංගල්ල කොට්ඨාස අපරාධ ස්ථාන පරීක්ෂණාගාර නිලධාරීන් විසින් ලබාගෙන තිබේ. ඒවා ද රජයේ රස පරීක්ෂක වෙත යොමු කර ඇත. මේ සාම්පලවල වාර්තා මෙතෙක් ලැබී නැත. එහි වාර්තා ලැබුණු පසු මේ සුදු පැහැති කැට සහ කුඩු විශේෂය කුමක්දැයි පැහැදිලිවම අනාවරණය වනු ඇතැයි පොලිස් තොරතුරු සඳහන් කළේය.
මේ ද්‍රව්‍ය අඩංගු කන්ටේනර් දෙක කොළඹ වරායෙන් නිදහස් කිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් ද පරීක්ෂණයක් ආරම්භ කර ඇත. ඒ හැරුණු කොට ශ්‍රී ලංකා රේගුව ද විමර්ශනයක් ආරම්භ කර තිබේ. එහි වාර්තාව ද මේ සතියේ නිකුත් වීමට නියමිතව ඇත.
මිද්දෙණියෙන් සොයා ගත් සුදු පැහැති කැට සහ කුඩු සම්බන්ධයෙන් වූ වැඩිදුර විමර්ශන පොලිස්පති නියමයෙන් පොලිස් මත්ද්‍රව්‍ය නාශක කාර්යාංශයට භාර දී තිබේ. ඒ අනුව පොලිස් මත්ද්‍රව්‍ය නාශක කාර්යාංශය විසින් ඒ ගැන විමර්ශන මේ වන විට පවත්වනු ලබයි.
ගයාන් කුමාර වීරසිංහ
Be First to Comment