මෙරට සමඟිය, සාධාරණත්වය සහ සමානාත්මතාව ඇති කිරීමට සියලු ආගම් අතර වන සහෝදරත්වයේ හා ළබැඳියාවේ ආදර්ශය ඉතා වැදගත් බව අගමැතිනි, ආචාර්ය හරිනි අමරසූරිය මෙණෙවිය පැවසුවාය.
ඓතිහාසික මාතර අප ස්වාමිදුවගේ ජාතික සිද්ධස්ථානයේ වාර්ෂික මංගල්‍යයට (14) එක්වෙමින් අගමැතිනිය මේ බව කියා සිටියාය.
මෙම වාර්ෂික දේවස්ථාන මංගල්‍යය මෙවර සංවිධානය වූයේ 118 වැනි වරටයි. ඒ සඳහා සහභාගි වූ අගමැතිනිය වෙත බදුල්ල රදගුරු පදවි දරන අතිඋතුම් ජූඩ් නිශාන්ත සිල්වා රදගුරු හිමිපාණන් වහන්සේ සහ ගාල්ල රදගුරු පදවි දරන අති උතුම් රේමන් වික්‍රමසිංහ රදගුරු හිමිපාණන් වහන්සේ විසින් විශේෂ ආශීර්වාද පූජාවක් සිදු කරන ලදි. ඉන් අනතුරුව දේවස්ථානයේ ප්‍රධාන ශාලාවේදී මාතර ප්‍රදේශයේ සර්ව ආගමික නායකයන් සහ අගමැතිනිය අතර විශේෂ සුහද හමුවක් පැවැත්විණි.
ඓතිහාසික සිද්ධස්ථානයක් වන අප ස්වාමිදුවගේ දේවස්ථානයේ පැවැත්වෙන මෙම ඓතිහාසික මංගල්‍යය අවස්ථාවට සම්බන්ධ වීමට ලැබීම විශාල භාග්‍යයක් බව ප්‍රකාශ කළ, අගමැතිනිය රජය වෙනුවෙන් මෙම දේව මංගල්‍ය සඳහා සුබපැතුම් එක් කළාය.
අගමැතිනිය වැඩිදුරටත් මෙසේ ද පැවසුවාය.
“මේ දේවස්ථානය සහ නගරයේ තිබෙන අනෙකුත් ආගමික ස්ථාන අතර තිබෙන සහෝදරත්වය හා ළබැඳියාවෙන් සමගිය, සාධාරණත්වය හා සමානාත්මතාව කියන හරයන් වෙනුවෙන් සිදු කරන මැදිහත්වීම අගය කළ යුතුයි. මාතර නගරයට පමණක් නොවෙයි මේ රටටම ඒ අවශ්‍යතාව තිබෙනවා. ඒ ආදර්ශය අපිට අවශ්‍යයි. ඒ ආදර්ශය අප වෙත ලබාදෙන ඔබ වහන්සේලා සියලු දෙනා වෙත මම ස්තූතිවන්ත වනවා, වගේම සමාජය වෙනුවෙන් සිදු කරන මේ සේවය සහ සමාජ සාධාරණත්වය වෙනුවෙන් සිදු කරන මේ මැදිහත්වීම තවදුරටත් ඉටු කරන්න ශක්තිය ධෛර්යය ලැබේවා කියා ප්‍රාර්ථනා කරනවා.
බදුල්ල රදගුරු පදවි දරන අතිඋතුම් ජූඩ් නිශාන්ත සිල්වා රදගුරු හිමිපාණන් වහන්සේ, ගාල්ල රදගුරු පදවි දරන අතිඋතුම් රේමන් වික්‍රමසිංහ රදගුරු හිමිපාණන් වහන්සේ, ගාලු පදවි අනු නායක මයිකල් රාජේන්ද්‍රම් පූජා ප්‍රසාදීන් වහන්සේ, සිද්ධස්ථාන පරිපාලක ජූඩ් සම්පත් විලේගොඩ පියතුමා ඇතුළු කිතුනු පියතුමන්ලා මේ මංගල්‍ය අවස්ථාවට එක්ව සිටියහ.
මාතර කොටුව රත්නපාල පිරිවෙනේ පරිවේණාධිපති, මහා මන්තින්ද පිරිවෙන් පරිවේණාධිපති ශාස්ත්‍රවේදී පණ්ඩිත තිස්සමහාරාමයේ ඉන්ද්‍රානන්ද නායක ස්වාමීන් වහන්සේ, මාතර කොටුවේගොඩ ජයසුමනාරාම විහාරයේ විහාරාධිපති යටිගල සෝමතිලක නායක ස්වාමීන් වහන්සේ ඇතුළු ගෞරවනීය මහා සංඝරත්නය ඇතුළු සර්ව ආගමික නායකයෝ මේ සඳහා එක්වූහ. කාන්තා හා ළමා කටයුතු ඇමැතිනි සරෝජා පෝල්‍ රාජ්, විපක්ෂ නායක සජිත් ප්‍රේමදාස, දකුණු පළාත් ආණ්ඩුකාර බන්දුල හරිස්චන්ද්‍ර මහත්ම මහත්මීහු ද සහභාගි වී සිටියහ.
නුවන් කොඩිකාර සහ ගන්දර සමූහ ජයසිරි පේදුරුආරච්චි
Be First to Comment