“මගේ රත්තරං දූට මේ වගේ දෙයක් වේවි කියලා මා හීනෙකින්වත් හිතුවේ නැහැ. අයියා එක්කරන් එන්න කියලා කොළඹ ගිය මගේ දූට මේ මොනවද වුණේ. මගේ දූ සුරංගනාවියො අරං ගිහිල්ලා යැයි කියමින් ඊයේ (16) අලුයම දක්ෂිණ අධිවේගී මාර්ගයේදී සිදු වූ වෑන් හා ලොරි රථ අනතුරින් මියගිය තරුණියගේ මව වන ඩේසි පතිරණ මහත්මිය හඬා වැටුණාය.
මෙසේ මියගියේ තවලම, හල්විටිගල පදිංචි පුෂ්පකුමාරි සඳමාලී ගමගේ (35) මෙණෙවියයි.
කුඩා දරුවන් තිදෙනකු ඇතුළුව පුද්ගලයන් අට දෙනකු තරුණිය ගමන් ගත් වෑන් රථයේ සිට ඇති අතර, ඉතිරි හත් දෙනාම තුවාල ලබා රෝහල් ගතකර තිබිණි.
ඊශ්‍රායල් රටේ රැකියාව කළ සිය සහෝදරයා මෙරටට පැමිණීම නිමිත්තෙන් ඔහුව රැගෙන ඒම සඳහා කටුනායක ජාත්‍යන්තර ගුවන්තොටට ගමන් කරමින් සිටියදී ඇය මේ අවාසනාවන්ත ඉරණමට ගොදුරු වූවාය.
මගේ දූ කේක් හදන්න හරිම දක්ෂයි. ඕපාතයි, තවලමයි කේක් කඩ දෙකක් කරනවා. එයාගෙම මහන්සියෙන් වාහනේකුත් ගත්තා. මුළු ඕපාතම එයාට ආදරෙයි. කවුරුත් ඇයට කතා කළේ “යමී කේක් අක්කා, යමී කේක් නංගී කියලා. මගේ දූ මාස දෙකකින් බඳින්නයි හිටියේ” යැයිද සඳමාලිගේ මව දැඩි ශෝකයෙන් යුතුව පැවසුවාය.
පස් දෙනකුගෙන් යුත් පවුලේ හතරවැනියා සඳමාලි ගමගේය. තවලම විද්‍යාරාජ විද්‍යාලයෙන් ඉගෙනුම ලැබූ ඇය තවලම, හල්විටිගල, ඕපාත ප්‍රදේශවල කාගෙත් හිත් දිනා සිටි දිරිය දියණියකි. තාත්තා කවුරුත් හඳුනන උඩුගම ලංගම ඩිපෝවේ සේවය කළ රංබණ්ඩාය. සඳමාලිගේ හදිසි මරණය ගැන මියගිය තරුණියගේ ලොකු අම්මා වන අනුරා පතිරණ මහත්මිය පැවසුවේ,
“අපේ දූ බඳින්න හිටියේ ලබන දෙසැම්බර් මාසේ. ඒ පුතා පැදවූ වාහනේ යද්දී තමයි මේ අනතුර වුණේ. රස කේක් හදන්න මේ දූ හරිම දක්ෂයි.
දක්ෂිණ අධිවේගී මාර්ගයේ 9.6 වැනි කිලෝමීටර් කණුව අසලදී කොළඹ දෙසට ධාවනය වෙමින් තිබූ ලොරි රථයක පිටුපස මෙම වෑන් රථය ගැටීමෙන් මෙම අනතුර සිදුව ඇති බව පොලීසිය පවසයි.
හිනිදුම – රවීන්ද්‍ර චන්ද්‍රලාල්
Be First to Comment