සමථකරණය ශක්තිමත් කිරීමෙන් උසාවි නඩු අඩු කර ගන්න පුළුවන්

සමථකරණ ක්‍රියාවලියට මේ වසරේ රුපියල් බිලියනයකට වඩා වැඩි ප්‍රතිපාදන වෙන් කර තිබෙන බව අධිකරණ සහ ජාතික ඒකාබද්ධතා ඇමැති නීතිඥ හර්ෂණ නානායක්කාර මහතා පැවසීය.

සමථකරණ ක්‍රියාවලිය ශක්තිමත් කිරීමෙන් අධිකරණයේ ගොඩගැසී ඇති නඩු ලක්ෂ දෙකක් පමණ අඩුකර ගැනීමට අපේක්ෂා කරන බව ද ඇමැතිවරයා පැවසීය.

කොළඹ 07, පදනම් ආයතයේදී පෙරේදා (16) පැවැත්වුණු ජාතික සමථ දිනය සැමරීමේ උත්සවයේ ප්‍රධාන ආරාධිතයා ලෙස එක්වෙමින් අධිකරණ සහ ජාතික ඒකාබද්ධතා ඇමැති නීතිඥ හර්ෂණ නානායක්කාර මහතා මේ අදහස් පළ කළේය.

1988 අංක 72 දරන සමථ මණ්ඩල පනත යටතේ 1990 වසරේ ජූලි මස 18 වැනි දින සිට සමථ මූල මණ්ඩලය පිහිටුවීමෙන් අනතුරුව පුරා වසර තිස් පහක් තුළ ස්වේච්ඡාවෙන් හා කැපවීමෙන් ජාතික මෙහෙවරක් ඉටු කරන සමථ මූල මණ්ඩල සභාපතිවරුන් ඇතුළු සියලු සමථකාර මහත්ම මහත්මීන්ට ගෞරවනීය ප්‍රණාමය පුද කිරීම උදෙසා සෑම වසරකම ජාතික සමථ දිනය නමින් දිනයක් නම් කර එය සැමරීම සිදු කරයි.

ඇමැතිවරයා මෙහිදී සඳහන් කළේ සමථ මණ්ඩලය වෙත වසරකදී ආරවුල් ලක්ෂ දෙකකට වඩා වැඩි ප්‍රමාණයක් යොමු වන බවයි. ‘සමථකරණ ක්‍රියාවලියට මේ වසර ඉතාම සුවිශේෂී වර්ෂයක් වන අතර 2025 වර්ෂයේ අය – වැය මඟින් සමථ මණ්ඩල කොමිෂන් සභාව වෙත රුපියල් බිලියනයකට අධික ප්‍රතිපාදන ප්‍රමාණයක් වෙන් කර තිබෙනවා. එමෙන්ම සමථ මණ්ඩල ශක්තිමත් කර ඉඩම් ආරවුල් පිළිබඳ විශේෂ සමථ මණ්ඩල දිස්ත්‍රික් 16ක පිහිටුවා ඇති අතර අධිකරණයට යොමුවන මූල්‍ය ආරවුල් ප්‍රමාණය අඩු කිරීමට මූල්‍ය ආරවුල් පිළිබඳ විශේෂ සමථ මණ්ඩල හඳුන්වා දී තිබෙනවා. එහි පළමු පියවර වශයෙන් කොළඹ, ගම්පහ, අනුරාධපුර, පොලොන්නරුව, මහනුවර සහ මොනරාගල දිස්ත්‍රික් හයේ විශේෂ මූල්‍ය ආරවුල් පිළිබඳ සමථ මණ්ඩල පිහිටුවීමට මේ වන විටත් කටයුතු කර තිබෙනවා.

සමථ මණ්ඩලය වෙත වසරකදී ආරවුල් ලක්ෂ දෙකකට වඩා වැඩි ප්‍රමාණයක් යොමු වෙනවා. සමථකරණ ක්‍රියාවලිය ශක්තිමත් කිරීමෙන් අධිකරණයේ ගොඩගැසීමට තිබූ තවත් නඩු ලක්ෂ දෙකක් පමණ වසරකදී අඩු කර ගැනීමට අපේක්ෂා කරනවා. අධිකරණ පද්ධතිය ඩිජිටල්කරණය කිරීමේ ව්‍යාපෘතිය හා සමගාමීව සමථ මණ්ඩලවල ආරවුල් දත්ත කළමනාකරණ පද්ධතියක් ස්ථාපනය කිරීමට කටයුතු කරමින් සිටිනවා. උසාවියකින් ලැබෙන තීන්දුවකට වඩා සමථ මණ්ඩලයකින් ලැබෙන තීන්දුව ඉතා මානුෂීයයි. එහි දිනුමක් හෝ පැරදුමක් නැතිවා සේම මානසික සුවයකින් ද යුක්තයි. සමථකරණය සෑම පුද්ගලයකුටම කළ නොහැකියි. එයට සුවිශේෂී හැකියාවන් තිබෙන්න ඕනෑ. මනුෂ්‍යයන්ට ආදරය කරුණාව දක්වන පුද්ගලයන් විය යුතුයි.

‘පොහොසත් රටක් – ලස්සන ජීවිතයක් ගොඩනැඟීමේ ක්‍රියාදාමයේ අත්‍යවශ්‍යම අංගයක් ලෙස, සෑම පුරවැසියකුටම නීතියට සම ප්‍රවේශයක් ලබාදීම සහතික කරන නීතියේ ආධිපත්‍යය සුරැකි සමානාත්මතාව රජයන සමාජයක් බිහි කිරීමට වර්තමාන රජය කැප වී කටයුතු කරනවා‘යැයිද ඇමැතිවරයා කීය. දිස්ත්‍රික් සමථ පුහුණු නිලධාරීන් ඇගයීමට සමරු තිළිණ පිරිනැමීම ද මෙහිදී සිදුවිය. අධිකරණ අමාත්‍යාංශයේ ලේකම් ජනාධිපති නීතිඥ අයේෂා ජිනසේන මෙණෙවිය, සමථ මණ්ඩල කොමිෂන් සභාවේ සභාපති විශ්‍රාමික ශ්‍රේෂ්ඨාධිකරණ විනිසුරු සී.පී. කීර්තිසිංහ මහතා, සමථ මණ්ඩල කොමිෂන් සභාවේ ලේකම් තිළිණි රත්නසූරිය මහත්මිය, අධිකරණ සහ ජාතික ඒකාබද්ධතා අමාත්‍යාංශයේ නිලධාරීන් පිරිසක් සහ සමථ මණ්ඩල කොමිෂන් සභාවේ සාමාජිකයන් ඇතුළු නිලධාරීන් පිරිසක් මේ අවස්ථාවට සහභාගි වූහ.

බුද්ධිකා ඉඹුලාන