ගම්පොළ නාරංවිට හරහා මහනුවර මාර්ගයේ දොළුව විහාරස්ථානය අසල සිදුවූ දරුණු රිය අනතුරකින් තිදෙනකු මිය ගොස් තුවාල ලැබූ දෙදෙනකු ගම්පොළ ශික්ෂණ රෝහලට ඇතුළත් කර ඇති බව පරීක්ෂණ පවත්වන ගම්පොළ පොලීසිය පවසයි.
ගම්පොළ නගරය දෙස සිට ගුරුකැළේ නිල්ලඹ දක්වා ගමන් ගත් මෝටර් රථයක් විහාරස්ථානය අසල සිටි කාන්තාවන් පිරිසක් යට කරගෙන නවතා තිබූ ලොරි රථයක ද ගැටීම නිසා මෙම අනතුර සිදුව ඇති බව පොලීසිය පවසයි.
අනතුරින් මියගොස් ඇත්තේ දොළුව, මෙගොඩ කළුගමුව පදිංචි රාමනායක මුදියන්සේලාගේ පොඩි මැණිකේ (70) දොළුව, නවගුරුකැළේ පදිංචි විජේසූරිය මුදියන්සේලාගේ මාලිනි විජේසූරිය (67) ගම්පොළ ගුරුකැලේ පදිංචි පල්ලෙ ගෙදර අනුලාවතී (67) යන තිදෙනායි.
සිද්ධියෙන් තුවාල ලබා රෝහල්ගත කර ඇත්තේ ගම්පොළ, දොළුව ගුරුකැළේ පදිංචි මල්වත්තේ ගෙදර ශ්‍රීමති (56) හා ගුරුකැලේ, නිල්ලඹ පදිංචි මෝටර් රථයේ රියැදුරු වන වර්ණ කුලසූරියගේ පත්මා නදීකා ප්‍රනාන්දු (38) යන අයයි.
රිය පැදවූ කාන්තාව ළඟ ඇත්තේ පුහුණු වන රිය බලපත්‍රයක් බව පොලීසිය පවසයි. මෙම කාන්තාව සැමියා හා ළමයින් දෙදෙනා සමඟ ගම්පොළ නගරයේ සිට පැමිණ ඇති අතර රියැදුරු බලපත්‍ර ඇති සැමියා නගරයේ සිට මාර්ගයේ මඟක් දක්වා මෝටර් රථය රැගෙන ආ බවත් ඉන්පසු ඔහු පුහුණු වන තම බිරියට එම මෝටර් රථය ලබා දී ඇති බවත් පරීක්ෂණවලින් අනාවරණය වූ බව පොලීසිය සඳහන් කරයි.
විහාරස්ථානය අසල සිටි පිරිස දැක මෝටර් රථයේ වේගය අඩු කිරීම සඳහා තිරිංග පැඩලය පෑගීමේදී වැරදීමකින් ඇයට වේග පැඩලය පෑගී ඇති බව ද ප්‍රකාශ වේ.
ඒ සමඟම වේගයෙන් ඇදී ගිය මෝටර් රථය මෙම පිරිස යට කරගනිමින් නවතා තිබූ ලොරි රථයේ ගැටී තිබේ.
එම ලොරි රථය යළි මාර්ගයට විසි වී ඇති අතර මෝටර් රථය ඒ අසල ඇති බැම්මක ගැටී නැවතී තිබේ.
මෝටර් රථයේ සිටි දරු දෙදෙනාට හෝ සැමියාට කිසිදු අනතුරක් සිදුවී නොමැති අතර මෝටර් රථයට හානි සිදුව තිබුණි.
Be First to Comment