හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන මහත්වරුන් ඔවුන්ගේ ආරක්ෂිත වාහන යළි ඉල්ලා ඇති බවත්, ඒ ඉල්ලීම ආරක්ෂක සමාලෝචන කමිටුවට යොමු කර එහි තීරණය මත නැවත එම වාහන දීමට කටයුතු කරන බවත් මහජන ආරක්ෂක හා පාර්ලිමේන්තු කටයුතු ඇමැති ආනන්ද විජේපාල මහතා පවසයි.
ඇමැතිවරයා මේ බව පැවසුවේ අම්පාර, සයින්දමරුදු ප්‍රදේශයේ පැවති උත්සවයකදී මාධ්‍යවේදීන් ඇසු ප්‍රශ්නයකට පිළිතුරු දෙමිනි.
එහිදී වැඩිදුරටත් අදහස් දැක්වූ ඇමැතිවරයා මෙලෙස ද කීවේය.
“මේ වෙන කොට විශ්‍රාමික ජනාධිපතිවරුන්ගේ හිමිකම් පනත යටතේ හිමිකම් අහෝසි වුණා. එයට අමතරව හිමිකම් පනත යටතට ගැනෙන්නේ ආරක්ෂාව සම්බන්ධ කාරණය. ආරක්ෂාවට යම් බලපෑමක් සිදු වෙනවා නම් ඒ ආරක්ෂිත වාහන නැවත භාරදීමට හැකියාවක් තිබෙනවා.
ඒ අනුව මේ වන විට හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන මහත්වරුන් ඔවුන්ගේ වාහන සම්බන්ධයෙන් නැවත ඉල්ලීමක් කර තිබෙනවා. ඒ ඉල්ලීම අපි මේ වන විට මහජන ආරක්ෂක අමාත්‍යාංශය යටතේ තිබෙන ආරක්ෂණ සමාලෝචන කමිටුවට ඉදිරිපත් කර තිබෙනවා. ලැබෙන තීන්දුව අනුව එම වාහන නැවත දෙන්න කටයුතු කරනවා.”
Be First to Comment